اتيكت الاكل فى المطاعم

البطاطس المحمرة

أكلها سهل جداً مش محتاج لا شوكة ولا سكينة إلا لو كانت أصابع البطاطس طويلة زيادة عن اللزوم بيتم قطعها نصين بالشوكة وممنوع تماماً استخدام السكينة.






البسلة

رغم إن فيها صلصة ومرقة وحاجات من دي إلا إنها بتتاكل بالشوكة بس بنفس طريقة الملعقة بمعنى إنك بتغرفي البسلة بالشوكة من الطبق.






الزيتون

طبعاً لو حاول حد أكل الزيتون بالشوكة حيسبب إصابة خطيرة للشخص اللي قاعد قدامه علشان كده أحسن حل إنك تاكلي الزيتون بإيديك وترمي النوى بلطف على جانب الطبق.






المكرونة الإسباجتي

فيه ناس علشان يسهلوا على نفسهم أكل المكرونة بيقطعوها قطع صغيرة قبل الأكل وده غلط جداً والمفروض إنك تمسكي الشوكة بشكل عمودي على الطبق وتبتدي تلفي الشوكة في المكرونة بس مش لمدة كبيرة علشان متخديش كمية زيادة عن اللزوم مره واحدة. وممكن تستعيني بالملعقة لسند المكرونة في الشوكة.






الحلويات والجاتوه
في حالة أكل الجاتوه بنستعين بالشوكة والملعقة الخاصين بالجاتوه وبنبعد عن استخدام السكينة وده بيتم عن طريق قطع الجاتوه بالشوكة مع استعمال الملعقة لسند القطعة المقطعة.






البيتزا:

البيتزا بتتاكل بالإيد وبتتمسك من قاع مثلث البيتزا ممكن طبعاً استخدام الشوكة والسكينة في أكلها.






الساندويتشات:
الساندويتشات دايما بتتاكل بالإيد ولا يستخدم فيها أي أدوات أخرى.






الفراخ

لازم تتاكل بالشوكة والسكينة ولو كان المقدم أمامك نصف فرخة فبنفصل الصدر عن الورك ونبدأ في تناولها بمنتهى البساطة. بس المهم التحكم الجيد في الشوكة والسكينة.






الشيش كباب
في حالة تقديم الشيش كباب في أسياخ على السفرة بيمسك السيخ بالشمال ونبدأ إخراج اللحم من السيخ بالشوكة الممسوكة بالإيد اليمين وبعدين يتم تقطيعها قطع صغيرة تناسب الأكل بس طبعاً مش بنقطعها مرة واحدة ولكن على عدد مرات احتياجك للأكل.



معلومات على الماشي...
* ممنوع تناول أي مشروبات في حالة وجود طعام بالفم.

* عند الشرب لايشرب كل محتوى الشراب مرة واحدة إنما يؤخذ على فترات.

* الفوطة مش بتتربط على الرقبة ولكن بتوضع بأناقة على الرجلين.

* فوطة السفرة مش بتستخدم في تجفيف العرق أو خلافه إنما هي لتجفيف الشفاه فقط.

* السكينة مش بتيجي خالص جنب الفم وممنوع منعاً باتاً لحسها.